The Pilapil Family

Saturday, December 15, 2012

Christmas Party Closing Remarks

Mayad gid nga hapon sa tanan!

Salamat gid sining masadya nga Christmas Party.

Salamat gid sa kooperasyon sang tanan nga ari diri subong para nga mapatigayon naton ini nga hilikuton. Gapasalamat gid kita sa aton talahuron nga presidente, Mr. Cubita; sa aton madumalampig nga bise president, Mr. Faner; sa aton mga mapisan nga mga sekretarya, Mrs. Lagmay kag Mrs. Sampaga, sa aton maalam nga tresurera, Mrs. Jalbuna; kag sa tanan-tanan nga BOT members nga mga mabakas gid, para mangin malampuson ang mga aktibidades sang MATODRAS. Salamat gid.

Kita parti gid sang isa ka organisasyon nga malampuson. Kag ginahandum nakon nga tani magpadayon gid naton ini. Ang subong nga BOT damo sang gina-isip nga programa para gid kaayohan sang tanan nga mga miyembro sang MATODRAS.

Ginatinguhaan naton nga aalangay gid ang mga bentaha ukon benepisyo nga makuha naton halin sa asosasyon. Wala sang may ginadapigan sa panahon nga may pagsuay. Nga fair gid ang aton mabaton nga penalty sa oras nga may mga violation kita. Ini tanan gina-obra namon pinaagi sa pagplantsa sang aton mga pagsulundan para nga klaro gid sa aton tanan kag magpabilin nga malinong ang aton pag-ululopod.

Gatinguha man kita nga makahimo sang mga programa para gid sa kalamboan sang tanan nga miyembro. Sa subong, ang Spareparts ginapadalagan na naton liwat sugod sang Setyembre subong nga tuig. Sa gina-emphasize naton, voluntary ang pagpa-miyembro diri. As of December 10, may 35 na ang naki-upod sa sini nga programa. Ang objective sini, amo nga matagaan gid kita sing katigayonan nga makabakal sang aton kaugalingon nga baligya kag maka-share sang makuha nga ginansya para dugang man sa aton kita.

Gina-estoryahan naman namon sa BOT ang pag-revive ang Cash Loan Program sang MATODRAS nga ginatawag naton sang una nga Coop. Indi pa naton sya subong matawag nga Cooperative kay wala pa kita nakapa-register sa Cooperative Development Authority. Kay sa subong, gina-plastar anay naton ang tanan nga mga issues nga dapat atubangon, tapos tan-awon man naton ang aton pagpadalagan kag kinahanglan pa naton ang minimum investment para kita maka-register. So, subong, ibutang ta lang anay sya bilang isa sa mga programa sang asosasyon para sa mga miyembro. Ginatinguhaan man naton nga masulbad ang gina-sige nalang naton ka-problema sa pagpangkolekta sang daily dues kag sang iban pa nga mga sulukton pinaagi sa pag-hire sang isa ka regular collector sugod sa una nga bulan sang 2013. Damo lang kita naisip nga mga income generating projects para sa may mga gusto magdugang kita samtang miyembro kita sang asosasyon.

Actually, kung padaloman gid naton isip, damo gid kita maobra as a group. Halimbawa, isipon naton ang scenario sa adlaw-adlaw naton nga mga kinahanglanon. Nagabakal kita bugas, sud-an, tinapay, biskwit, gatas, kape, isda, sardinas, mga papel, ballpen kag lapis sang mga kabataan, load sang cellphone, bulong kag kung ano pa nga mga kinahanglanon sa aton panimapalay. Bisan pa gani sigarilyo, beer o ano pa da. Ngaa baklon pa ina naton sa Licanda, Double D, New Ginzu ukon Green Ribbon kung pwede man kita mismo makapatindog sang aton kaugalingon nga Superstore halin sa bisan ginagmay lang naton nga mga contribution? Kag i-manage ini sang aton mga miyembro o kapamilya.

Personally, ginapanan-aw ko gid ini. Kag mangin matuod lang ini tanan kung ma-cooperate kita nga mga miyembro pinaagi sa pagiging honest sa aton mga dealings parehas abi sa pagbayad gid sa aton gina-utang kag paghimo sang iban pa nga mga obligasyon sa asosasyon. Kay isipon ta, pila kita kabilog sa MATODRAS? Pila kita ka pamilya? Kung kita pa lang mismo mabakal sang aton mga baligya, ma-sustain na gid ang mahimo ta nga Superstore. Ano pa gid ayhan kon ang iban nga Miagaoanon mabakal man sa aton?

 Ini, sa subong, vision lamang. Matigayon lang gid ini depende kon ugyonan naton tanan. Ang isipon ta lang gid nga kung magmadinalag-on ang mga programa sang asosasyon, para man ini sa aton bentaha tanan.

 So tani ini nga mga programa maka-contribute para nga magMalipayon gid ang aton Paskwa kag aton Bag-ong Tuig mapuno gid sang Paglaum kag Katigayonan!

Madamu gid nga SALAMAT!

________
MATODRAS Christmas Party
Gavin & Vinny Beach Shade
Mabatad, Miagao, Iloilo
December 15, 2012
 

Labels: ,

Copyright © 2006-present Pilapil Family. Some Rights Reserved.

--------------------------------------------
--------------------------------------------

0 Comments:

Post a Comment

Home